Mankomunitateko lehendakariaren ebazpena
Mankomunitateko lehendakariaren ebazpena, zeinaren bidez onesten baita lanpostu hutsak merezimendu-lehiaketaren bidez betetzeko deialdia, aldi baterako enplegua egonkortzeko eta finkatzeko prozesu bereziaren barnean, Enplegu publikoan dagoen behin-behinekotasuna murrizteko premiazko neurrien abenduaren 28ko 20/2021 Legean xedatutakoaren arabera
Maialen Lujanbiok jantzi du txapela 2022ko Euskal Herriko Bertsolari Txapelketa Nagusian
Joanes Illarregi leitzarrak saio dotorea egin du bere lehendabiziko finalean
Maialen Lujanbiok irabazi du, hirugarren aldiz, Euskal Herriko Bertsolari Txapelketa Nagusia. Ohi bezala saio dotorea eta osoa eginez, txapela etxera eraman du, eta bertsolari oso handia dela erakutsi du. Buruz burukoan Amets Arzallusekin batera aritu da eta ariketa ederrak osatu dituzte bien artean, binaka aurrena eta banaka ondoren, ganbarako ariketan.
Ondoren sailkatu dira, hurrenkera honetan, gainerakoak: Aitor Mendiluze hirugarren, Sustrai Colina laugarren, Alaia Martin bosgarren, Beñat Gaztelumendi seigarren, Nerea Ibarzabal zazpigarren eta Joanes Illarregi zortzigarren.
Saioa, oro har, ederra izan da, bertsolariak ase eta gustura utzi dituena. Leitzako eta eskualdeko bertsozale ugari elkartu da Iruñeko Navarra Arenan, eta ederki nabaritu da Joanes Illarregiren bertsoek izan duten harreran. Joanes Illarregik erakutsi du, aurreko saioetan egin zuen moduan, punta-puntako eta goi mailako bertsolaria dela. Gaztea da oso, eta nafarra, eta horrek esanahi berezia eman dio lehendabiziko aldiz Nafarroan jokatu den finalean egin duen saioari.
Bukatu da txapelketa eta ikusi da, besteak beste, bertsogintza sasoiko dagoela eta gazteak badatozela berriz ere, baita gure eskualde honetan ere.
Gure eskualdeko bertsolari bat Euskal Herriko Bertsolari Txapelketako finalean
Abenduaren 18an jokatuko da Euskal Herriko Bertsolari Txapelketako finala, eta bertan gure eskualdeko bertsolari bat izanen da: Joanes Illarregi leitzarra. Finala Iruñean jokatuko da, eta Nafarroan jokatuko den lehendabiziko aldia izanen da. Lehendabizikoa aldia izanen da, halaber, finalistak finalera lortutako puntuazioaren arabera sailkatzen direnetik, bertsolari nafar bat bertan izanen dena.
Joanes Illarregik Bilboko saioan lortu zuen finalerako txartela, puntu horiek aurreko saioari gehituta. Nafarroako Bertsolari Txapelketan lortu zuen Euskal Herrikoan jokatzeko aukera, baita ederki baliatu ere, Elizondon, Arrasaten eta Bilbon egindako lanak finalerako txartela eman baitiote. Maila ikusgarria erakutsi du Joanesek, eta merezitako saria eskuratu du, punta-puntako bertsolariekin Iruñerako zortzikotean sartu baita.
Leitzako bertso-eskolan hasitako bertsolaria da Joanes, Xabat anaiarekin eta beste hainbat lagunekin batera. Finalerako sailkapen hau ere, horrenbestez, eta neurri batean bederen, Leitzako bertso-eskolari eta hura sustatu dutenei zor zaio.
Euskalgintzaren Kontseiluak 25 urte eginen ditu abenduaren 6an
25 urteko ibilbidea osatu du dagoeneko Euskalgintzaren Kontseiluak. 1997an sortu zen, abenduaren 6an hain zuzen ere, eta Durangoko Azokan egin zuen bere buruaren aurkezpena. Orduan Euskararen Gizarte Erakundeen Kontseiluaren izena hartu zuen, eta Euskal Herrian euskararen normalizazioan eta euskalgintzan lanean ari ziren gizarte eragileen bilgune eta ordezkaritza zabalena bihurtu zen.
25 urte hauetan makina bat ekimen, jarduera, kanpaina, harreman eta proposamen egin ditu Kontseiluak, eta euskalgintzako ezinbesteko erreferentzia bihurtu da. Hasi berritan Euskal Herriko hiriburuetako kirol estadio nagusiak betetzeko ekintza erraldoi hura antolatu zuen, eta geroztik ekimen eta urrats esanguratsu ugari egin ditu: Bai Euskarari Akordioa, Bai Euskarari Ziurtagiria, Hizkuntza Eskubideen Behatokiaren sorrera, Hizkuntza Eskubideen Protokoloa, Batuz Aldatu akordioa…
25. urteurren hori ospatzeko 2022ko abenduaren 6an ekitaldia eginen du Euskalgintzaren Kontseiluak. Durangon, bere burua aurkeztu zuen toki berean hain zuzen ere. Egun horretan bertan, Kontseiluko idazkari izandako Paul Bilbaok lekukoa emanen dio Idurre Eskisabeli, eta hura izanen da aurrerantzean Kontseiluaren zuzendaritzaren lana eta dinamika gidatzeaz arduratuko dena.
1475 lagunek eta 110 entitatek eman dute izena Euskaraldian gure eskualdean
2022ko Euskaraldia abian da, hitzez ekiteko garaia iritsi da, beraz, ekimenaren leloak dioen moduan. Izena emateko deialdia eta epea bukatuta, gure eskualdeko 110 entitateak (ariguneak) 1475 lagunek eman dute izena ekitaldian, honela banatuta:
2022ko Euskaraldia abian da, hitzez ekiteko garaia iritsi da, beraz, ekimenaren leloak dioen moduan. Izena emateko deialdia eta epea bukatuta, gure eskualdeko 110 entitateak (ariguneak) 1475 lagunek eman dute izena ekitaldian: Norbanakoen izen-ematea, udalerriz udalerri, honela banatu da:
Araitz: 64 (55 ahobizi eta 9 belarriprest)
Aranon 29 (25 ahobizi eta 4 belarriprest)
Areson 45 (42 ahobizi eta 3 belarriprest)
Basaburua: 114 (88 ahobizi eta 26 belarriprest)
Betelu: 60 (56 ahobizi eta 4 belarriprest)
Goizueta: 197 (186 ahobizi eta 11 belarriprest)
Imotz: 55 lagun (39 ahobizi eta 16 belarriprest)
Larraun: 86 (79 ahobizi eta 7 belarriprest)
Leitzan 478 (435 ahobizi eta 43 belarriprest)
Lekunberri: 186 (171 ahobizi eta 15 belarriprest)
Odieta: 17 (14 ahobizi eta 3 belarriprest)
Ultzama: 144 (114 ahobizi eta 30 belarriprest)
Ariguneak, berriz, honela banatu dira:
Basaburua-Imotz-Ultzama-Odietan: 9
Araitz-Betelu-Larraun-Lekunberrin: 35
Arano-Areso-Goizueta-Leitzan: 66
Euskarazko Produktuen Katalogoaren paperezko edizioa banatzen ari da eskualdean
Euskarazko Produktuen KATALOGOAk eginda dauka, dagoeneko, ibilbide luzea, eta urtero iristen da gure eskuetara. Izenak argi adierazten duen gisan, euskaraz dauden produktuen berri ematen du eta modu argi eta ordenatu batean aurkezten ditu. Izan ere, era guztietako produktuen merkatu zabalean euskarazkoak ere badaude, baina ez daude beti behar bezain erakusgarri edo ikusgarri.
Horixe da, beraz, KATALOGOAren helburua: euskarazko produktu horiek ikusaraztea, zer erosi aukeratzeko garaian horiek ere gogoan izan ditzagun, betiere euskaraz bizitzen jarraitzeko aukerak indartzeko asmoz.
KATALOGOAk bi xede-talde nagusi ditu: 0-12 urteko haurrak, eta 12-16 urte bitarteko gaztetxoak. Papereko edizioa, argitaratu berria, egunotan banatuko da eskualdean, batez ere ikastetxeen laguntzaz. Horretaz gain, urte osoan zehar eguneratzen den katalogoa kontsulta daiteke katalogoa.eus webgunean.
Udalerri euskaldunetako gazteentzako deialdia: Gazteok Arnas Eguna. Azaroaren 26an, Larrabetzun
Iturria: www.uema.eus
Udalerri euskaldunetako gazteen harremanak saretzeko eta sendotzeko eguna izango da Gazteok Arnas Eguna. Salto udalekuen ostean sortutako harremanetatik sortu da egun osoko topaketa egiteko asmoa, eta bertan, udalekuetan parte hartu zuten gazteak zein udalerri euskaldunetako gazteak elkartzea da asmoa. UEMAko zenbait udalerritatik autobusak egongo dira Larrabetzura joateko.
Larrabetzuko gazteekin batera antolatu dugu Gazteok Arnas Eguna, eta gazteen nahietatik abiatutako egitaraua da Larrabetzun: tailerrak, ekitaldia, bertso-bazkaria, Zo-Zongó perkushow taldea, Nahia Novo DJa, Kuluxka Klan…
Izena emateko, galdetegi hau bete behar dute gazteek, eta joan-etorria autobusez egiteko aukera izango dute, euren zonaldeko autobusa betez gero. Izena emateko 15 euro ordaindu behar dute gazteek.
Amazabal Institutuko Naiara Juanikorena leitzarrak irabazi du Arnasetik bideosormen lehiaketako sarietako bat
Arnasa gara egitasmoaren baitan, Arnasetik bideosormen lehiaketa antolatu du UEMAk aurten. Arnasa gara 2019an abiatu zuten elkarlanean UEMAk, Nafarroako Gobernuak eta Eusko Jaurlaritzak, euskararen arnasguneak hizkuntzaren bizitasunerako duten garrantzia jendarteratzeko.
Helburu horrekin, beraz, Arnasetik egitasmoak UEMAko herrietako gaztetxoen parte-hartzea sustatu nahi izan du. 99 lan aurkeztu dira lehiaketan eta gure eskualdean egindako batek, hain zuzen ere, irabazi du lehendabiziko saria DBH 1 eta 2 mailetako kategorian, Idiazabalgo ikasle batekin berdinduta.
Naiara Juanikorena leitzarraren bideoak Ni naiz ni du izena, eta hemen ikus daiteke egin duen lana.
