Bardoak 2014 ekimeneko bigarren saioa asteburu honetan
Otsailaren 7an abiatu zen Bardoak bertso-ekimena, eta asteburu honetan eginen dute bigarren saioa taldeek. Gure eskualdeko hiru talde ariko dira: Leitzako Beti berandu… ta gauz onik ez Otsagabian ariko da 16:30ean Gartxot Elkartean, eta Harrapazank taldea Leitzan bertan, 18:00ean, Aurrera Elkartean. Biak ere larunbatean. Mailopetarrak taldeak (Araitz-Betelu-Larraun) Gaintzako elkartean eginen du saioa larunbatean, arratsaldeko 19:00etan.
Goizuetan lanean hasi da Arnasguneen tailerretan osatutako lantaldea
2013. urtearen bukaeran egin ziren Goizuetan “Arnasguneen tailerrak”, euskaraz bizitzeko eragozpenak identifikatzeko eta euskaraz bizitzeko aukerak indartu eta handitzeko. Tailerren ondoren lantalde bat sortu da herrian orduan proposatutako ideiak eta ekintzak abian jartzeko, eta dagoeneko egin du lehendabiziko bilera eta lanean hasi da.
Gure eskualdeko hiru taldek egin dute dagoeneko lehen saioa BARDOAK 2014 bertso ekimenean
Pasa berri den asteburuan egin dira BARDOAK 2014 ekimenaren lehendabiziko saioak, eta bertan aritu dira gure eskualdeko hiru talde. Harrapazank taldeko leitzarrek Arbizun egin zuten saioa ostiralean, baita irabazi eta jokoan zegoen puntua eraman ere. Larunbatean Larraungo Paelletan Mocedades taldekoak Iruñeko alde zaharrean aritu ziren Iruñekoekin batera, eta hiriburukoek eraman zuten puntua. Araitz-Betelu-Larraungo taldeak, Mailopetarrak, Txantrean egin zuen saioa, eta horretan ere puntua beste taldekoek eraman zuten. Saio guztiak jendetsuak izan ziren, eta giroa ederra.
Jose Iribasek entzungor egin dio D ereduari buruzko azalpen eskeari
Edurne Elizondo
Iturria: Berria.info
Guardia Zibilak D ereduari buruz egindako txostenaren inguruan azalpenak ematera deitu zuten atzo Nafarroako Parlamentura, baina Nafarroako Hezkuntza kontseilari Jose Iribasek ez zuen auzi horri buruz hitzik ere erran nahi izan. Bilduk eta Aralar-NaBaik eskatu zuten Iribasen agerraldia, eta atzoko saioa, hain zuzen ere, bi talde horien aurka egiteko baliatu zuen kontseilariak.
Ostiralean hasiko da Bardoak taldekako bertso-ekimena. Gure eskualdeko lau talde ariko dira bertan.
Otsailaren 7an hasiko da Bardoak Nafarroako taldekako bertso ekimenaren bigarren edizioa. 16 taldek hartuko dute parte, eta horietako lau gure eskualdekoak dira: Leitzako bi talde eta Larraungo eta Araitz-Betelu-Larraungo bana.
Otsailaren 7an eginen du Leitzako Harrapazank taldeak (Migel Mari Elosegi “Luze”, Iñigo Ibarra, Joanes Illarregi) lehendabiziko saioa Arbizun, otsailaren 8an Larraungo Paalletan Mocedades taldeak (Arkaitz Goikoetxea, Julio Soto, Joana Ziganda, Luis Mari Larreta) Iruñean, eta egun berean ariko dira Araitz-Betelu-Larraungo Maillopetarrak taldekoak (Oskar Estanga, Aritz Saragueta, Aitor Irastortza) Txantrean. Leitzako beste taldea, Beti berandu… ta gauz onik ez!, (Ander Fuentes “Itturri”, Mikel Azpiroz, Iñigo Sagastibeltza), otsailaren 15ean hasiko da lehian, Otsagabian.
Mediku eta pediatra euskaldunak eskatzeko kanpainari trabak ezarri dizkio Osasunbideak
Iturria: www.uema.org
Elizondoko osasun-etxean kanpainaren berri ematen duen materiala eta eskaera-orriak biltzeko kutxa jartzeko debekua iritsi da Osasunbideatik. Antolatzaileek udaletxera pasa behar izan dute osasun etxean zegoen material guztia. Eskaera egin nahi duten herritarrek osasun-etxean jaso beharko dute eskaera-orria, behin eskaera bete eta osasun-etxeko harreran aurkeztuta, kopia orria Iruritako kontsultategian edo Elizondoko udaletxean egongo den kutxan utzi beharko dute.
Euroituna berresteko proposamena onartu egin dute Frantziako diputatuek
Aitor Renteria
Iturria: berria.info
Frantziako Asanblea Nazionalak Euroituna berresteko proposamena onartu du. 529 diputaturen artean 510 boz izan ziren atzoko saioan: 361 boz konstituzioa aldatzearen aldekoak, eta 149, aurkakoak. Prozedura laburra izan zen. Orotara oren erdi iraun zuen bozketak eta bozen azalpenak. Colette Capdevielle Baionako diputatu sozialistak nabarmendu zuen bozketaren helburua dela gobernuari erakustea gehiengo zabala duela hizkuntza gutxituen aldeko lege xedea aurkezteko. Gobernuak bere egiten badu proposamena, erreferenduma egin beharra saihestuko luke. Gisa berean, proposamena senatuan aztertzea baztertuko luke aukera horrek.
BARDOAK 2014, Nafarroako taldekako bertso ekimena, laster abiatuko da
BARDOAK taldekako bertso ekimena da. 2012.ean egin zen lehendabiziko aldiz, arrakasta handiz, eta aurten ere eginen da, otsailaren 7tik aurrera. Ekimenean gure eskualdeko lau taldek parte hartuko dute, Leitzako bik eta Larraun eta Araizko banak.
