Egunero kultur proposamen bat
"ERA Belaunaldi berrien aukera" izeneko webgunean koronabirusak sortu duen egoerara egokitzeko proposamenak argitaratzen dira egunero. ERA webgunea Nafarroako udaletako euskara zerbitzuek sortua da, eta 0-12 urte bitarteko haurren gurasoei zuzendua dago nagusiki.
Webgunean (http://www.eranafarroa.eus) euskaraz aritzeko eta euskaraz bizitzeko hainbat baliabide, aholku eta modu aurkitu daitezke, eta egunotan sortu den egoera berezirako, "eguneko kultur proposamena" izeneko atal bat sortu da. Atal horretan, egunero-.egunero, proposamen zehatz bat egiten ari da, interesgarria, arina eta erosoa.
Eguneko proposamen horretaz gain, webguneko "baliabideak" atalean, euskarazko hainbat baliabide interesgarri aurkitu daitezke: jokoak, pelikulak eta marrazki bizidunak, aplikazioak, ipuinak...
Egunotako egoerari aurre egiteko aukera bikaina, beraz, ERAnafarroa atarian.
Euskarazko udalekuen eskaintza
Aurtengo udalekuetan izena emateko epea dagoeneko martxan da. Gaur egun bizi dugun ziurgabetasun egoera honek kolokan jar ditzake heldu den udan egitekoak diren udalekuak, baina momentuz, enpresetako arduradunek adierazi dutenez, udalekuak egiteko asmoak bere horretan dirau. Uda hurbildu ahala hartuko dituzte dagozkien erabakiak, orduko egoeraren arabera.
Bitartean, izen-emate prozesuak bere horretan jarraitzen du. Udaleku askok izen-emate epea ireki dute, eta beste batzuek laster eginen dute. Hortaz, hemen duzue informazio guztia eskura:
LH-ko ikasleentzako udaleku eskaintza: https://eranafarroa.eus/…/…/2020/03/LH_Poster_2020_72ppp.pdf
DBH-ko ikasleentzako udaleku eskaintza: https://eranafarroa.eus/…/uploads/2020/03/DBH_Poster_2020_7…
Leitzaketa 4.0. “Etxealdirako” lehiaketa erraz eta arina
Leitzaketa 2000. urtean euskara zerbitzuak eta kultur taldeak argitaratutako mahai-joko baten izena da. 1000 galderaz osatutako jokoa zen, eta tribial baten antzeko arauak zeuzkan. Herriaren ezagutza zabaltzea eta indartzea zuen helburu, baita ongi pasatzea eta entretenitzea ere, noski.
Helburu horiei eutsita, koronabirusak ekarri digun egoera honetarako Leitzaketa berri bat sortu dute euskara zerbitzuak eta Balikebale lehiaketa antolatzen duen lantaldeak. Oraingoan, kartoizko mahai-jokoa izan beharrean, telefono edo ordenagailu bidez jokatzeko aukera ematen duen lehiaketa antolatu dute. Honatx, labur-laburrean, lehiaketari buruzko argibide batzuk:
.- Lehiaketa astelehenetik ostiralera eginen da (biak barne). 10 galdera jarriko dira, gehienak Leitzari buruzkoak, eta batzuk Euskal Herriari buruzkoak.
.- Lehiaketa 20:15ean eginen da. Ordurako, parte-hartu nahi duenak aplikazioan sartuta egon beharko du, eta hori lotura batean klikatuz eginen du, oso modu errazean.
.- Parte-hartzaile guztiek batera eginen dute ariketa, adierazitako ordu horretan.
.- Galderei erantzuteko 2 minutuko tartea izanen da, eta tarte hori bukatu ondoren ariketa gelditu eginen da.
.- Asmatutako erantzunen arabera, eta erabilitako denboraren arabera, eguneko sailkapena sortuko da, eta webgune honetan argitaratuko da, 20:30ean.
Ariketa erraza eta arina da, eta zerbait ikasten lagunduko digu gainera. Beraz, anima zaitez eta parte hartu.
* Lotura honetan jokoaren prozedura eta parte hartzeko modua argi azalduta ikus dezakezu. Ohartuko zaren bezala, erraza eta arina da:
http://www.iparmank.eus/euskara/argitalpenak/leitzaketa-40-nola-parte-hartu
GURE HERRIOTAKO TOKI-IZENAK SAREAN ESKURAGARRI, ERRAZ ETA EROSO
Nafarroako Gobernuak toponimia ofiziala erraz eta eroso begiratzeko eta kontsultatzeko modua eskaintzen duen tresna sortu du, eta sarean jarri du.
Nafarroako Toponimia Ofizialaren Bisore Geografikoa
Tresna horrek toki-izenak eta mapak lotzen ditu, eta bertan kontsultatu dezakegu gure herri guztietako toponimia osoa. Software librean oinarritutakoa da, eta gure telefonoan, tabletean, ordenagailuan ikus dezakegu.
Orain arte liburuetan eta paperezko mapetan begiratu behar genuena, aurrerantzean erraz aski ikusi ahalko dugu gure gailuetan.
Nafarroako Gobernuak, Euskarabidearen webgunean, tresna honen inguruko argibideak eta azalpenak ematen dituen bideo bat jarri du. Merezi du begiratzea, webguneak, toponimoak erraz aurkitu eta ikusteko aukera ematez gainera, beste aukera asko ere ematen dituelako: bilatzailea, toki-izenen inguruko informazio zehatza eta historikoa, herrietako toki-izenen zerrendak, ahoskera, ortofotoak, katastroa, distantziak edo azalerak neurtzeko modua…
BALIKEBALE 4.0.
Leitzan egiten den Balikebale lehiaketaren IV. edizioa abian da. Aurreko hiru edizioak erabat arrakastatsuak izan ziren, laugarrena ere hala izatea espero dute antolatzaileek. Lehiaketa apirilaren 3an izanen da, ostirala, 20:00etan, eta Leitzako Herri Areto berrian eginen da.
Izena emateko epea dagoeneko irekita dago, eta lehian parta hertu nahi duten taldeek otsailaren 28ra arte izanen dute izena emateko epea. Parte hartzeko baldintzei dagokionez, taldeak hiru pertsonakoak izanen dira, eta lau talde ariko dira. 18 urtetiko gorakoa izan behar da lehiakide gisa aritzeko eta, lau talde baino gehiagok izena ematen badute, zozketa eginen da horietako lau hautatzeko.
Izena emateko Euskara Zerbitzura (948 51 08 14, laga@iparmank.eus) edo Karrape Irratira (948 61 09 14, karrapeirratia@gmail.com) jo behar da.
EUSKARA IKASLEENTZAKO LAGUNTZA-DEIALDIA
Nafarroako Iparraldeko Euskara Mankomunitateak euskara ikasleentzako diru-laguntzak arautzen dituen deialdia onartu du. Horren arabera, 2019ko irailaren 1etik 2020ko abuztuaren 31 arte euskara ikasten aritu diren edo ariko diren ikasleek diru-laguntza jasoko dute, eskaera egin eta baldintza jakin batzuk betetzen badituzte.
Baldintzak, hain zuzen ere, honakoak dira: diruz lagundutako ikastaroaren % 80an parte hartu dela frogatzea, Nafarroako Iparraldeko Euskara Mankomunitatea osatzen duten herrietan erroldatuta egotea, eta udalekiko zerga betebeharrak ordainduta izatea.
Deialdi osoa eta deialdiaren inguruko xehetasun guztiak (laguntzaren zenbatekoak, baldintzak, aurkeztu beharreko agiriak eta epea…) webgune honetan bertan ikus daitezke, “diru-laguntzak / deialdiak” atalaren barruan, “euskara ikasteko bekak” azpiatalean.
Udalerri euskaldunetako gazteentzako topaketak Zumaiatik Lekeitiora izango dira aurten
Ibiltaria izango da aurten ere UEMAk antolatutako ekimena, ekainaren 29tik uztailaren 5era, eta Zumaiatik Lekeitiorako bidea egingo dute parte hartuko duten gazteek. Otsailaren 19an zabalduko da izena emateko epea. Udalerri euskaldunetako gazteak euskararen inguruan sentsibilizatzea, kontzientziatzea eta eragile aktibo bihurtzea da topeketen helburua.
Iturria: www.uema.eus
MARMARI ETA PANPANOZIRI ALDIZKARIAK
Ohi den bezala, urtearen bukaeran Marmari eta Panpanoziri aldizkariak argitaratu eta Leitzako nahiz Aresoko etxebizitza guztietan zabaldu dira, hurrenez hurren. Marmari urtero banatzen da, eta bi urtean behin, berriz, Panpanoziri. Biak ere, ohi den bezala, herriari buruzko erreportajez eta artikuluz ongi hornituta: euskara, herrigintza, herriko pertsonaiak, jakingarriak…
Azkeneko bi zenbaki horiek, baita aurreko guztiak eta gure eskualdean argitaratzen ditugun beste bi aldizkariak ere (Goizuetako Xapo eta Aranoko Miaxiria) webgune honetan jasota daude, “argitalpenak” izeneko atalean, eta bertan kontsultatu edo bertatik deskargatu daitezke.
