"Urrezko orrazia" ikusentzunezkoa larunbatean
Martxoaren 12an, larunbata, 19:00etan "Urrezko Orrazia" ikusentzunezkoa izanen dugu Aralar Musika Eskolaren eskutik Lekunberriko kiroldegian. Mitologiarekin lotutako ikuskizun honetan Musika Eskolako haur zein gazte abesbatzako 120 ikasleak izango dira taula gainean. Hau da, Araitz, Areso, Betelu, Lantz, Larraun, Leitza, Lekunberri, Odieta eta Ultzamako ikasleak.
Sinopsia: "Urrezko Orraziaren atzean zein misterio izkutatzen da? Ipuin musikatu honetan Lua neska gazteak biziko duen abentura zoragarria ezagutuko dugu."
Egitaraua eta parte hartzaileak, ondoko lerrootan:
Mailope, Xapo, Marmari eta Pulunpe argitalpenak eguneratuta
Mailope aldizkaria Araitz eta Larraungo bailaretan argitaratzen den hilabetekaria dugu, 32 orrialde koloretsutakoa, Xapo eta Marmari, aldiz, Leitzan eta Goizuetan, hurrenez hurren, argitaratzen diren urtekariak dira, eta Pulunpe Imotz, Basaburua, Ultzama, Atetz, Odieta, Anue eta Lantzen banatzen da.
Berauen paperezko edizioak argitaratu dira jada, baina edizio digitala, PDF formatuan, webgune honetan topa dezakezue. Hona hemen esteka zuzenak:
Mailope hilabetekaria
Marmari urtekaria
Xapo urtekaria
Pulunpe aldizkaria
Sukaldaritza tailer gaztea
Gizarte eta Euskara Zerbitzuek antolatuta, larunbata honetan, otsailak 20, sukaldaritza tailerra izanen dugu Uitziko elkartean (Larraun). Bertara Larraun ibarreko DBH 1, 2, 3 eta 4 ikasmailetako gazteak gonbidatuak daude. 16:30ean hasi eta 21:30 aldera amaituko da ekimen goxo hau.
Menua: pizza, patata amorratuak, eta hiru postre goxo izanen ditugu. Joan den ikasturtean Lekunberriko Kattagorri elkartean antolatu zen ikastaroa eta ederki pasa zuten gazteek. Aurten halaxe izatea espero dugu.
Mailoperen urteko batzarra ostiralean
Mailope tokiko aldizkariak urteko batzarra eginen du datorren ostiralean, otsailak 12. Gain ordenean ditugu 2015eko kontu ekonomikoa eta 2016ko aurrekontua, iritzi/kritika bilketa, balorazioa... Jende berriaren ekarpena, bultzada, eskatzen da elkartetik. Hortaz, bilera irekia izanen da.
Eguna: Ostirala 12
Ordua: 19:00
Lekua: Beteluko Indianoetxea
Santa Ageda: Araitz eta Larraun bailarak
Otsailaren 4a bueltan dugu eta, ohi bezala, Santa Agedaren bezperak ospatuko dira Euskal Herri osoko herrietan. Besteak, beste, Larraun eta Araizko haranetan entzun ahal izanen ditugu martiriari eskainitako koplak.
Bai Larraunen eta bai Araizko haranean ere, 17:00etan abiatuko dira kantuan eta bietan mokautxoa izanen da askaltzeko. Baserritar jantzia hartu, eztarriak berotu, eta konpainia ederrean igaroko dugu ostegun arratsaldea.
Euskaraz Mintza tailerra Lekunberrin
EUSKARAZ MINTZA proiektua Euskal Herriko hainbat ikastetxetan martxan ari da, Lekunberriko Ibarberri eskola horien artean dagoelarik. Helburu nagusia hizkuntza planaren barnean, ikasleek jolas tradizionalen bitartez gelatik kanpo euskara erabil dezaten lortzea dugu. Horretarako etxean eta lagunen artean barneratzen dituzten hizkuntza erregistroak eskaintzea da gure ekintzaren betebehar nagusiena. Hau dela eta, begirale bat zuen seme-alabekin jolasean aritzen da jolastorduetan irakasleekin koordinaturik.
Euskaraz Mintza tailerra, Lekunberriko spot-a: https://youtu.be/hHLOZjM8Rb0
Bardoak martxan, Araitz-Larraun eta Leitzako taldeak
Joan den, urtarrilaren 22an, ostirala, martxan jarri zen beste behin ere Bardoak Nafarroako taldekako bertso ekimenaren hirugarren edizioa. Edizio hau martxoaren 19an amaituko da, Etxarri-Aranazko finalean. Bitartean, 23 saio antolatuko dira.
Antolatzaileen arabera, edizio honetan 16 taldek hartuko dute parte, guztira 121 parte-hartzailerekin. Horietatik 71 bertsolari aterako dira plazara, inoizko kopururik handiena, eta 20 kidek publiko aurrean lehenengoz kantatzeko pausua emango dute. Bardoek eskainiko duten saio kopurua ere ez da nolanahikoa, bi hilabetetan 23 saio izanen baititu taldekako txapelketak.
Dantza-tailerra, Mintzakide
Joan den ikasturtean hasi zen, Araitz eta Larraun bailaretako Mintzakideren bitartez, jarduera osagarriak antolatzen. Azkenekoa ardoaren sortze prozesua eta dastaketa azkar bat izan bazen, oraingo honetan euskal dantzen bi orduko tailerra izanen dugu protagonista.
Mikel Lasartek eskainia, datorren asteartean, otsailak 2, izanen dugu tailer labur hau: 17:00etan Lekunberriko Ibarberri eskolan. Sarrera irekia eta doakoa da, probestu aukera dantza erraz batzuk ikasten hasteko! Herriko neska-mutilek eskertuko dizute.
